Федорова Амелия: Ил Дархан елкатыгар Сунтаар улууһуттан 31 оҕо уонна 3 салайааччы буолан кытынныбыт. 2 автобуһунан, икки күн айаннаатыбыт, аара Үөһээ Бүлүүгэ хоммуппут. Бу киэһэ Дьаархантан сылдьар Павлов Русланныын оонньуу тэрийэн ыыппыппыт бииргэ баран иһэр оҕолорбутун кытта билсиһиибитин саҕалаабыта. Мантан инньэ билсибит дьон быһыытынан үөрэ -көтө айаннаабыппыт. Дьокуускайга тиийэн Сосновай Борга түспүппүт. Киирээти кытта Саҥа дьыл долгутуулаах тыына, эйэҕэс баһаатайдар көрсүбүттэрэ. Иккис күммүтүгэр “Седьмое небо” рестораҥҥа Ирбэт тоҥ музейыгар, циркэҕэ эрчиллиигэ сылдьыбыппыт. Графиккпыт олус плотнай, мүнүүтэтигэр тиийэ тутуһаллар. Ахсынньы 26 күнүгэр елкабытыгар бараары хара сарсыардаттан бэлэмнэнэн түбүгүрбүтүнэн барбыппыт эрээри, траурунан сибээстээн көһөрөн кэбистилэр. Үһүс күммүтүн гражданскай форумҥа сылдьан, улууһунан визиткэ күрэҕэр кыттаммыт олус туһалаахтык атаардыбыт.
Күүтүүлээх кэммит тиийэн кэлэн, тэринэн, оҥостон циркэҕэ айаннаатыбыт. Олус диэн долгуйбутум. Маннык улахан тэрээһиҥҥэ оскуолам миигин талан ыыппытыгар олус диэн махтанабын.
Данилова Диана: Дьокуускайга икки күн айаннаан тиийбиппит. Биһигини үөрэҕирии управлениетыттан Меркурьева А.В., Яковлева Н.П. илдьэ сырыттылар. Елкабыт циркэҕэ буолбута. Представлениелара олус интэриэһинэй этэ. Наҕараадалары туттарыы кэнниттэн дискотекалаабыппыт. Араас улуус оҕолорун кытта билсиһэн, доҕордоһон, оонньоон –көрүлээн сынньанан кэлбиппит. Мин елкаҕа сылдьыбыппыттан олус үөрэбин, бу түгэн өйбөр –санаабар мэлдьи хаалыаҕа. Ил Дархан елкатыгар кыттар чиэскэ тиксибиппиттэн махтаныам этэ оскуолам уонна оҕо дьиэтин үлэһиттэригэр. |
